الأخبار ›
الحدود الشمالية ›
بالتعاون مع جمعية الثقافة والفنون الهيئة العامة للثقافة تقيم أمسية شعرية شعبية، والنادي ينظمها
بالتعاون مع جمعية الثقافة والفنون الهيئة العامة للثقافة تقيم أمسية شعرية شعبية، والنادي ينظمها
عرعر تايمز - التحرير :
في أمسية جماهيرية في الشعر الشعبي .. فرسانها الشعراء ماجد الجارد وأحمد السديري وأحمد مناور حضرت معهم روح الشباب المقترنة بالإبداع الشعري الذي لفت إليه الأنظار، فكانت أمسية شبابية شعرية ثقافية مميزة، وهي من الأمسيات التي تقيمها الهيئة العامة للثقافة بالتعاون مع جمعية الثقافة والفنون، التعاون مع جمعية الثقافة والفنون، ونظمها النادي الأدبي الثقافي بالحدود الشمالية في مدينة عرعر، وأدارها الإعلامي عبدالرحمن الحضري، فتنوعت بين الحوارات التي سبرت أغوار الشعراء، وبين شعرهم الجميل الذي ألهب الأكف تصفيقًا وإعجابا.
وفيما يلي مقتطفات من قصائدهم:
* الشاعر أحمد مروي السديري:
كان الولا محتاج له حلف واثبات
حنا من اول دون هذي موالين
الروح مرهونه بوقت المهمات
لاهل الوطن والدار بارقابنا دين
قل للمشكك ساعة الصفر بالذات
يشوف شي ٍ مايسر المعادين
*
تمسكنا بمضمون العقيده
ومن نهر الولاء حتى ارتوينا
خليج الخير وبلاد العروبه
حباها الله في دنيا ودينا
وابن كلثوم يوم الجاهليه
صدع في بيت صحى الغافلينا
الا لا يجهلن احدً علينا
فنجهل فوق جهل الجاهلينا
*
الضيق درب يمر به كل محتاج
ياما وقف بعض الحكي في لساني
رازقني الله بالسعه وقت الاحراج
اضحك بوجه الوقت والعمر فاني
انا خوي اللي له الطيب منهاج
ان ضاق جيته وان تضايقت جاني
مادام لي مبدأ ومدخل ومخراج
بين الوجيه اللي تنومس مكاني
*
الشهر هذا غير عن كل مافات
نزل به القرآن هدي ٍ وتذكير
وشلون مانستقبله بالمسرات
وحنا على هلاله نسوق التباشير
فضله على كل الشهور اكبر اثبات
هذا رمضان الخير ياباغي الخير
به ليلةٍ تتعب جميع الحسابات
ياحظ من هو قامها دون تقصير
الله رزقنا دين كله كرامات
والله خلقنا عن جميع البشر غير
*
يامملكة شعري اذا جالك نصيب
قولي جديد اللي على بالك طرى
قولي مايعجب صاحب العقل اللبيب
بين الوجيه اللي تنومس وشعرى
اغازل الفكره وانا منها قريب
وعيوني الثنتين حاربها الكرى
الشعر ديوان العرب واصدق طبيب
مبطي انا وياه بالوقت خشرا
من عادته يحضر ولايمكن يغيب
قدام قامات الشعر ماهو ورى
قدام من دايم على العليا طليب
واليا خذلوه الناس يعطيهم سرى
مجالس اهل الطيب والصدر الرحيب
هي راس مالي ما تباع وتنشرى
وكل العلوم اللي على بالي تغيب
الا علوم المصطفى خير الورى
الوقت هذا شيب اللي مايشيب
وش عاد باقي من عدانا ماجرى
هم ٍ يطيب وهم لايمكن يطيب
لاوصلت الدعوى حدود ام القرى
هذي السعودية عمت عين الحريب
هي قبلة العالم وهي اطهر ثرى
اللي طعنا بالظهر ماهو صحيب
واللي جنح للسلم حنا له ذرى
* الشاعر ماجد الجارد:
* وطنية
يااطهر بلد سيره وتربه ووجدان
واسمى بلد هيبه ورِفعه وهامه
للخير مدهالٍ وللعدل ميزان
وللجار ريف وللمعاهد سلامه
وكادو لنا ناسٍ على الشر عوّان
حتى غدا في وجه الايام شامه
*
* وحي التناقض
ياعالم الغيب ياذا الفضل والجَبَروت
ياكافل الرزق يالمانع ومحيْ العظام
يامنجيٍ يونس اللي نام في بطن حوت
وياجاعل النار لبراهيم برد وسلام
تكتب لي التوبه بدنياي قدام اموت
وعن ميتة السوء ترزقني بحسن الختام
* الشاعر أحمد مناور العنزي ..
* قصيدة توليفة الحرف:
للحرف توليفه وللجو تلطيف
ومغازل الاذواق فن وذرابه
من دون مجهود ومشقه وتكليف
جسّد احاسيسك شعر بالكتابه
ماتِقطَف زهور البساتين بالسيف
والسهم مايرميه قوس الربابه
* قصيدة طوق النجاة:
استدرات به على كل أتجاه
وذوقتّه من الشقى لين استوى
حي لكن شاف نفسه بالحياه
شخص ماله من معاناته دوى
من كثر ماهالزمن جار وجفاه
جاوب اللي من على القمه عوى
* قصيدة رهوفة:
بأعذب احاسيس القصيد الراقي
وبلذ نكهاته و عبق حروفه
تفضلي ياعمري اللي باقي
اختاري من الشعر (يارهوفه)
فليت لعيونك جميع أوراقي
ماعاد هي في رفها مصفوفه
* قصيدة وين الغيبة:
ياهاجسي وين انت وين الغيبه
ماهي بعاده لك زمان مغيب
تركتني مابين شك وريبه
وانا حبيب معك وانت حبيب
ماتدري ان بعض الغياب مصيبه
يلعب براس المنتظر ويشيب
وفي نهاية الأمسية تم تكريم الشعراء بشهادات شكر وتقدير من قبل رئيس النادي ماجد المطلق، وشارك في التكريم بعض الحضور ومنهم الشاعر المعروف مروي السديري.
تعليقات : 0 | 
إهداء : 0 | 
زيارات : 499 | 
